"بہاول پورریجن میں ٹریفک سیکیورٹی مہم کاآغاز” ڈی آئی جی ٹریفک پنجاب وقاص نذیراورریجنل پولیس آفیسر رائےبابر سعید (تمغہ امتیاز)کاٹریفک قوانین عملدرآمد مہم کا جائزہ

بہاول پورریجن میں ٹریفک سیکیورٹی، حادثات میں کمی، فضائی آلودگی پر کنٹرول اور سڑکوں کو محفوظ بنانے کے لیے ایک جامع اور موثر مہم کا باضابطہ آغاز کر دیا گیا ہے۔مہم کا بنیادی مقصد صوبے میں بڑھتے ٹریفک حادثات کی شرح کو کم کرنا، فضائی آلودگی میں کمی لانا، ٹریفک قوانین کے اطلاق کو سخت بنانا اور سڑکوں کو ہر شہری کے لیے محفوظ بنانا ہے۔

ڈی آئی جی ٹریفک پنجاب وقاص نذیر اور ریجنل پولیس آفیسر رائے بابر سعید (تمغہ امتیاز) نے بہاولپور میں ٹریفک قوانین پر عملدرآمد اور شہریوں کے تحفظ کے حوالے سے جاری مہم کا جائزہ لیا۔

ڈسٹرکٹ پولیس آفیسر بہاولپور حسن اقبال سمیت رحیم یار خا ن اور بہاولنگر اضلاع کے ڈسٹرکٹ پولیس آفیسرز، ایس پی آر آئی بی، آر او اسپیشل برانچ، آر ٹی او اور ڈی ٹی اوز اجلاس میں شریک تھے۔اجلاس میں فیصلہ ہوا کہ پنجاب پولیس، اسپیشل برانچ، پی ایچ پی (پنجاب ہائی وے پٹرول) اور ٹریفک پولیس مشترکہ حکمت عملی کے تحت اس مہم کو کامیاب بنائیں گے۔

اجلاس میں بتایا گیا کہ وزیراعلیٰ پنجاب اور آئی جی پنجاب کے احکامات کی روشنی میں شروع ہونیوالی مہم کا بنیادی مقصد حادثات میں کمی، فضائی آلودگی پر قابو پانا، ٹریفک قوانین پر عملدرآمد کو یقینی بنانا اور سڑکوں کو مزید محفوظ بناناہے۔اجلاس میں فیصلہ کیا گیا کہ پنجاب پولیس، اسپیشل برانچ، پی ایچ پی (پنجاب ہائی وے پٹرول) اور ٹریفک پولیس مل کر ایک مشترکہ حکمتِ عملی کے تحت اس مہم کو بھرپور طریقے سے آگے بڑھائیں گی۔

ریجن بھر کے تھانوں کی حدود میں اسکولز اور کالجز کی انتظامیہ کے ساتھ مستقل اور فعال رابطہ رکھا جائے گا تاکہ کم عمر ڈرائیونگ، خطرناک ڈرائیونگ، تیز رفتاری، بلامقصد موٹر سائیکل ریسنگ اور غیر ذمہ دارانہ روڈ رویوں کو جڑ سے ختم کیا جا سکے۔ اجلاس میں واضح کیا گیا کہ بغیر ہیلمٹ ڈرائیونگ، بغیر رجسٹریشن گاڑیوں کا استعمال، اوورلوڈنگ، ون ویلنگ، بغیر لائسنس ڈرائیونگ، دھواں چھوڑتی گاڑیاں، ان فٹ یا اوور سائز گاڑیاں اور روڈ سیکیورٹی قوانین کی خلاف ورزی کرنے والوں کے خلاف نہ صرف چالان بلکہ ایف آئی آر کا اندراج بھی کیا جائے گا۔

ریجنل پولیس آفیسر رائے بابر سعید نے تینوں اضلاع کے ڈسٹرکٹ پولیس آفیسر ز کو ہدایات دیتے ہوئے کہا کہ ٹریفک قوانین کا نفاذ صرف کارروائی تک محدود نہ رہے بلکہ شہریوں کی آگاہی، رہنمائی اور تعاون کو بھی مہم کا حصہ بنایا جائے تاکہ ایک ذمہ دار اور محفوظ سوسائٹی کا قیام ممکن ہو سکے۔

پولیس حکام کا کہنا ہے کہ شہری ٹریفک قوانین کی پابندی کرتے ہوئے گاڑیوں کی بروقت فٹنس کو یقینی بنا کر اور دھواں چھوڑنے والی یا خراب گاڑیوں کے استعمال سے گریز کریں اور اس عوامی فلاحی مہم میں بھرپور تعاون کریں۔

پنجاب حکومت اس سے قبل بھی مختلف ادوار میں ٹریفک بہتری، روڈ سیفٹی آگاہی، ہیلمٹ کمپین، انسدادِ فضائی آلودگی اقدامات اور ڈرائیونگ لائسنسنگ اصلاحات کے ذریعے ٹریفک نظام کو بہتر بنانے کی متعدد کوششیں کر چکی ہے تاہم موجودہ مہم اپنی وسعت، مربوط حکمتِ عملی، سخت کارروائی اور جدید پلاننگ کے باعث اب تک کی سب سے بڑی، جامع اور نتیجہ خیز کمپین قرار دی جا رہی ہے، جس سے آئندہ مہینوں میں ٹریفک نظام میں واضح بہتری کی توقع کی جا رہی ہے۔