تعمیراتی مشینری کے لیے ایک ارب روپے کا سمیولیشن بیسڈ تربیتی ادارہ تجویز

اسلام آباد۔ 4 مارچ (اے بی سی):وزارتِ صنعت و پیداوار نے تعمیراتی شعبے میں مہارتوں کے خلا کو پُر کرنے کے لیے ٹیکنالوجی اپ گریڈیشن اینڈ سکل ڈویلپمنٹ کمپنی (ٹسڈیک) کے تحت تعمیراتی مشینری کے لیے سمیولیشن بیسڈ تربیتی ادارہ قائم کرنے کی تجویز دی ہے۔ویلتھ پاکستان کو دستیاب سرکاری دستاویزات کے مطابق، سکل ڈویلپمنٹ انسٹی ٹیوٹ فار کنسٹرکشن مشینری (ایس ڈی آئی سی ایم) کا مقصد بھاری تعمیراتی مشینری پر خصوصی توجہ کے ساتھ تعمیراتی صنعت کو مضبوط بنانا ہے۔یہ ادارہ تعمیراتی معیار میں بہتری اور برآمد کے قابل افرادی قوت کی تیاری کے ذریعے معیشت کو تقویت دینے میں معاون ثابت ہوگا، جس سے زرمبادلہ کی آمدن میں اضافے کی توقع ہے۔دستاویزات کے مطابق اس منصوبے کی مجموعی لاگت ایک ارب روپے (1,000 ملین روپے) مقرر کی گئی ہے جبکہ مالی سال 27-2026 کے لیے 300 ملین روپے مختص کرنے کی تجویز ہے۔

منصوبہ پی سی-ون کے مرحلے میں ہے۔مجوزہ ادارے میں ہیوی ارتھ موونگ ایکوپمنٹ (ایچ ای ایم ای) کے سمیولیٹرز فراہم کیے جائیں گے جن میں ٹاور کرین، کرین، ایکسکیویٹر، بلڈوزر، ڈمپ ٹرک، روڈ رولر اور گریڈر شامل ہیں، تاکہ جدید ٹیکنالوجی کے مطابق افرادی قوت کو تربیت دی جا سکے۔تربیتی خدمات میں ہیوی وہیکل آپریشن، ہیوی وہیکل مرمت و دیکھ بھال، نیز سروے اور مانیٹرنگ کی تکنیکیں شامل ہوں گی۔تربیت یافتہ اور برآمد کے قابل افرادی قوت کی دستیابی سے زرمبادلہ میں اضافے اور تعمیراتی شعبے کی مجموعی استعداد بہتر ہونے کی توقع ہے۔ان اداروں کا قیام پاکستان کی تعمیراتی افرادی قوت کو جدید خطوط پر استوار کرنے کی جانب ایک اہم قدم قرار دیا جا رہا ہے۔ تیز رفتار شہری ترقی اور بنیادی ڈھانچے کے منصوبوں میں بڑھتی ہوئی سرمایہ کاری کے باعث بھاری تعمیراتی مشینری کے ہنر مند آپریٹرز کی طلب میں نمایاں اضافہ ہوا ہے۔

تاہم مستند اور تکنیکی طور پر تربیت یافتہ افرادی قوت کی کمی کے باعث اکثر منصوبوں میں تاخیر، لاگت میں اضافہ اور حفاظتی مسائل سامنے آتے رہے ہیں۔مجوزہ اداروں کا مقصد سمیولیٹر پر مبنی منظم تربیتی پروگرامز کے ذریعے اس خلا کو پُر کرنا ہے، جو حقیقی کام کے ماحول کی نقل کرتے ہوئے بغیر خطرات اور سائٹ پر تربیت سے وابستہ زیادہ اخراجات کے موثر تربیت فراہم کریں گے۔اس اقدام سے نوجوانوں کے لیے روزگار کے مواقع پیدا ہونے اور بین الاقوامی منڈیوں، خصوصاً مشرقِ وسطیٰ اور دیگر خطوں میں جہاں مستند ہیوی مشینری آپریٹرز کی طلب زیادہ ہے، ہنر مند افرادی قوت کی برآمدی صلاحیت میں اضافہ ہونے کی بھی توقع ہے۔