حکومت کا 61 کروڑ 50 لاکھ ڈالر کے گرین فنانسنگ منصوبے سے 8 کروڑ ٹن کاربن اخراج کم کرنے کا منصوبہ

اسلام آباد۔18مئی (اے بی سی):پاکستان برآمدی مسابقت بڑھانے اور منصوبے کی مدت کے دوران کاربن ڈائی آکسائیڈ کے مساوی (CO₂e) 8 کروڑ ٹن تک اخراج سے بچنے کے لیے 61 کروڑ 50 لاکھ ڈالر کے گرین فنانسنگ منصوبے پر کام کر رہا ہے۔ویلتھ پاکستان کو دستیاب دستاویزات کے مطابق "گرین فنانسنگ کے ذریعے گرین برآمدی صلاحیت میں اضافہ” کے عنوان سے یہ منصوبہ ایکسِم بینک کی قیادت میں مقامی مالیاتی اداروں کے اشتراک اور بین الاقوامی ترقیاتی مالیاتی تعاون کے تحت آگے بڑھایا جا رہا ہے۔دستاویز کے مطابق یہ پروگرام اہم برآمدی شعبوں بشمول ٹیکسٹائل، چمڑا، چاول اور سرجیکل مصنوعات کو ہدف بنائے گا تاکہ صنعتوں کو یورپی یونین کے کاربن بارڈر ایڈجسٹمنٹ میکانزم کے تقاضوں پر عمل درآمد میں مدد فراہم کی جا سکے اور صنعتی شعبے میں کاربن کے اخراج میں کمی کی وسیع کوششوں کو فروغ دیا جا سکے۔مالیاتی پیکیج ایک مشترکہ مالیاتی ڈھانچے پر مبنی ہوگا جس میں 60 کروڑ ڈالر رعایتی قرض اور ایک کروڑ 50 لاکھ ڈالر گرانٹ امداد شامل ہوگی۔اس منصوبے کا مقصد برآمد کنندگان کو کم قرض لاگت پر ماحول دوست ٹیکنالوجی اور توانائی بچانے والے پیداواری نظام اپنانے میں معاونت فراہم کرنا ہے۔ اس کے علاوہ مشینری کی اپ گریڈیشن اور قابلِ تجدید توانائی کے حل متعارف کرانے کے لیے تکنیکی معاونت بھی فراہم کی جائے گی۔اس منصوبے پر ملک بھر میں متعلقہ شعبوں میں عمل درآمد کیا جائے گا اور اسے شریک مالیاتی اداروں اور ترقیاتی مالیاتی طریقہ کار کے ذریعے نافذ کیا جائے گا۔دستاویز کے مطابق یہ منصوبہ پاکستان کے 2030 کے اخراج میں کمی کے اہداف سے ہم آہنگ ہے اور بدلتے ہوئے عالمی ماحولیاتی معیارات کے تناظر میں مقامی برآمد کنندگان کی مسابقت بڑھانے کا ہدف رکھتا ہے۔منصوبے کے تحت فنڈز کا استعمال مشینری کی تبدیلی اور صاف توانائی سے متعلق اپ گریڈیشن پر کیا جائے گا تاکہ توانائی کی کارکردگی بہتر بنائی جا سکے اور صنعتی اخراج میں کمی لائی جا سکے۔سرمایہ کاری کا ڈھانچہ غیر ملکی زرِ مبادلہ تحفظ کے ساتھ ایک مشترکہ قرض ماڈل پر مبنی تیار کیا گیا ہے، جبکہ منصوبے کے مالیاتی اشاریوں میں 9.9 ارب ڈالر کی خالص موجودہ مالیت (NPV) اور 3.08 فیصد داخلی شرح منافع (IRR) شامل ہے۔یہ منصوبہ پائیدار ترقیاتی اہداف 8، 9، 12 اور 13 سے بھی ہم آہنگ ہے جبکہ اس کے متوقع نتائج میں صنعتی شعبے میں ہنر مند روزگار کے مواقع کی فراہمی بھی شامل ہے۔یہ پروگرام پائیدار صنعتی طریقہ کار کو فروغ دینے اور پاکستان کو کم کاربن پر مبنی اقتصادی ترقی کی جانب منتقل کرنے کی وسیع کوششوں کا حصہ ہے۔