اسلام آباد 16 مارچ (اے بی سی):حکومت نے اسلام آباد کے شہریوں کو محفوظ، حفظان صحت کے اصولوں کے مطابق اور ریگولیٹڈ گوشت کی فراہمی یقینی بنانے کے لیے 3 ارب روپے کی لاگت سے جدید ذبح خانہ اور ہول سیل میٹ مارکیٹ قائم کرنے کا منصوبہ بنایا ہے۔ویلتھ پاکستان کے پاس دستیاب سرکاری دستاویزات کے مطابق اسلام آباد میں جدید ترین ذبح خانہ اور ہول سیل میٹ مارکیٹ کا قیام” نامی یہ منصوبہ جدید گوشت پروسیسنگ سہولیات قائم کرکے لائیو سٹاک سیکٹر کو بہتر بنانے، مناسب اور ویٹرنری ریگولیٹڈ ذبیح کے طریقوں کو یقینی بنانے اور گوشت کو ذخیرہ کرنے اور ٹرانسپورٹ کے دوران تازہ رکھنے کے لیے کولڈ چین سسٹم تیار کرنے کا مقصد رکھتا ہے۔یہ منصوبہ پروسیسڈ اور زیادہ قیمت والے گوشت کی مصنوعات کی پیداوار کو بھی فروغ دینے کا ارادہ رکھتا ہے، جس سے سیکٹر زیادہ موثر اور مقابلہ کرنے کے قابل بن جائے گا۔
دستاویز کے مطابق یہ اقدام نیشنل ایگریکلچر انوویشن اینڈ گروتھ پروگرام کے ساتھ ہم آہنگ ہے، کیونکہ اس میں کولڈ چین لاجسٹکس متعارف کروائی جا رہی ہے اور آئی ایس او اور حلال کے معیارات کے مطابق پروسیسنگ کو یقینی بنایا جا رہا ہے تاکہ فوڈ سیفٹی بہتر ہو اور برآمد کے لیے تیاری میں اضافہ ہو۔یہ تین سالہ منصوبہ جو جولائی 2026 سے جون 2029 تک شیڈول ہے، اسلام آباد کیپیٹل ٹیریٹری ایڈمنسٹریشن، کیپیٹل ڈویلپمنٹ اتھارٹی (سی ڈی اے)، اور وزارتِ نیشنل فوڈ سیکیورٹی اینڈ ریسرچ کے تحت لائیو سٹاک اینڈ ڈیری ڈیولپمنٹ بورڈ کے اشتراک سے نافذ کیا جائے گا۔ یہ سہولت اسلام آباد کے سیکٹر I-11/4 میں قائم کی جائے گی۔حکومت کے فائیو ایز فریم ورک (عروج پاکستان 2024-29) کے تحت، یہ منصوبہ کوالٹی سٹینڈرڈز کے مطابق گوشت کی پیداوار یقینی بنا کر برآمدات میں اضافہ کرنے کا ہدف رکھتا ہے۔
یہ جدید پروسیسنگ سہولیات متعارف کروا کر انفراسٹرکچر کو بھی بہتر بنائے گا۔اس کے علاوہ یہ منصوبہ مناسب ویسٹ مینجمنٹ اور اخراج کنٹرول کے ذریعے ماحولیات کے تحفظ میں مدد دے گا، گوشت کی پیداوار اور سپلائی کی مانیٹرنگ کے لیے ڈیجیٹل ٹریکنگ سسٹم متعارف کروائے گا، اور تاجروں کے لیے زیادہ شمولیت اور سپورٹ کے ذریعے بہتر مواقع پیدا کرے گا۔یہ منصوبہ ذبح کے کاموں کو ایک ہی ویٹرنری نگرانی میں مرکزی سہولت کے تحت لانے کا ارادہ رکھتا ہے تاکہ مناسب صحت اور حفاظتی معیارات یقینی بنائے جا سکیں۔
اس کے علاوہ ایک مربوط ہول سیل میٹ مارکیٹ، ویسٹ واٹر ٹریٹمنٹ اور سالڈ ویسٹ مینجمنٹ سہولیات تیار کرنے کے ساتھ جانوروں کے ضمنی مصنوعات کی پروسیسنگ یونٹس بھی قائم کیے جائیں گے۔یہ اقدام غیر ریگولیٹڈ اور غیر رسمی ذبح کے طریقوں سے ہونے والی بیماریوں پر قابو پانے میں مدد دے گا۔ یہ ایک ٹریس ایبل گوشت سپلائی چین قائم کرنے اور پروسیسنگ اور لاجسٹکس میں روزگار کے مواقع پیدا کرنے میں بھی معاون ثابت ہوگا۔