30 ستمبر کے بعد انکم ٹیکس گوشوارے جمع کرانے پر 25 ہزار روپے جرمانے کی تجویز
تاجروں کے لیے مجوزہ آسان ٹیکس سکیم، تاخیر پر 25 ہزار روپے جرمانے کی تجویز. تاجروں کے لیے مجوزہ آسان ٹیکس سکیم کے تحت 30 ستمبر کے بعد انکم ٹیکس گوشوارے جمع کرانے والے تاجروں پر 25 ہزار روپے جرمانہ عائد کرنے کی تجویز سامنے آگئی۔ذرائع کے مطابق وزیراعظم محمد شہباز شریف 14 اگست کو تاجروں کے لیے آسان ٹیکس سکیم اور رواں مالی سال کے انکم ٹیکس گوشوارے کا نیا فارم متعارف کرائیں گے۔مجوزہ سکیم کے تحت 30 ستمبر تک بروقت انکم ٹیکس گوشوارے جمع کرانے والے تاجروں کو خصوصی سہولت دینے کی تجویز ہے۔ بروقت گوشوارہ جمع کرانے والے تاجروں کو آسان ٹیکس سکیم کی رجسٹریشن فیس سے استثنیٰ دینے کی تجویز بھی شامل ہے۔ذرائع کا کہنا ہے کہ 30 ستمبر کے بعد گوشوارہ جمع کرانے والے تاجروں کے لیے 25 ہزار روپے رجسٹریشن فیس اور 25 ہزار روپے جرمانہ عائد کرنے کی تجویز ہے۔ اس کے علاوہ بروقت گوشوارے جمع کرانے والے تاجروں کو 25 ہزار روپے کی رجسٹریشن پلیٹ فراہم کرنے کی تجویز بھی زیر غور ہے۔مجوزہ سکیم کے تحت کاروباری افراد اور انفرادی ٹیکس دہندگان کے لیے الگ الگ انکم ٹیکس گوشوارہ فارم متعارف کرانے کی بھی تجویز ہے۔ذرائع کے مطابق رواں مالی سال کے انکم ٹیکس گوشوارے کے لیے نیا فارم 14 اگست کو لانچ کیا جائے گا، جس کا مقصد تاجروں کے لیے ٹیکس گوشوارے جمع کرانے کے عمل کو مزید آسان بنانا ہے۔واضح رہے کہ جرمانوں، فیس اور مراعات سے متعلق مذکورہ تفصیلات فی الحال مجوزہ تجاویز ہیں۔ حتمی قواعد و ضوابط متعلقہ حکومتی نوٹیفکیشن کے بعد نافذ ہوں گے۔
About the Author
